Сөйлеу синтезі

Аяулы Анамыз Төремұратқызы Әзима 1928 жылы дүниеге келген. Руы Қабақтың Бөгенбайы. Өзі кіндіктен жалғыз. Ата – анасы өте ерте қайтыс болып кеткен. Жас қалған анамыз әкесінің інісі Бердімұрат көкеміздің қолында тәрбиеленеді. Бердімұрат көкеміз де, Назым жеңгемізде жалғыз қарындасының алдынан кесе өтпеген, өмірлерінің соңғы кезеңіне дейін оларға анамыздың дегені заң болды. Олардан тараған балдары анамызды апа демей, аға деп атаған. Анамыздың жастық жағы соғыс кезеңіне тап болды. Ер азаматтар соғыста жүргенде, жастар жұмысқа ерте араласты. Соның бірі анамыз 14 жасынан дүкенге сатушы болып орналасады. «Мен дүкенде нан сатушы болдым, сондықтан біз көп аштыққа ұшыраған жоқпыз» деп отыратын. Содан кейінгі жылдары Шалқардың орталығында орналасқан «Универмаг» дүкенінде меңгеруші болып жұмыс істеді. Содан соң Шалқар ауданаралық базасының өндірістік тауар бөлімін басқарып, зейнетке шыққанша, одан кейін де біраз жыл жұмыс жасады. Өзінің қызметіне берілген еңбекқор кісі еді. Сауда саласында 40 жылдан астам еңбек етті. Тылдағы еңбек ардагері». Соғыс жылдарындағы еңбегі үшін 1947 жылы Совет одағы Жоғары Кеңесі Президиумының бұйрығымен «1941 – 1945жылдары Ұлы Отан соғысындағы еңбектегі ерліктері» үшін медалімен марапатталады. 1970 жылы астанамыз Алматы қаласында өткен Қазақ Республикасы тұтынушылар Қоғамы және сауданың VII кәсіп одақ съездеріне делегат болып сайланды. Сол жылдары Республикалық «Қазақстан әйелдері» журналына суреті жарияланды. 1971 жылы СССР Жоғарғы Кеңесі Президиумының бұйрығымен «Еңбек Қызыл Ту» орденімен марапатталды. 1983 жылы «Еңбек ардагері» медалімен, «Кеңестік тұтынушылар кооперациясының үздігі» белгісімен, сонымен қатар бірнеше мадақтау грамоталарымен марапатталды. «Совет саудасының үздігі», КПСС мүшесі, Коммунистік еңбек екпіндісі. 1995 жылы Қазақ Республикасы Президенті бұйрығымен «1941–1945ж. Ұлы Отан соғысының жеңісінің 50 жылдығы» мерекелік медалімен марапатталды. Анамыз 1951 жылы Руы Жаңғылыш, Қожай тайпасынан шыққан әкеміз Қалиев Бөлекпен отау құрады. Атамыз Ұлы Отан соғысына қатысқан. Бірнеше орден медальдарымен марапатталған. Соғыстан кейін қаржы саласында жұмыс жасаған. Ленинград қаласының Бүкілодақтық жоғарғы қаржы мектебін бітірген. Шалқар, Хобда аудандарының қаржы мекемелерін басқарған. Алты ағайынды, баланың үлкені. Бауырлары Қостайбек, Назия, Разия, Адайбек, Тобанияз. Әкеміз бен анамыз Ұлы Отан соғысындағы және Тылдағы ерліктері үшін Шалқар қаласының Энциклопедия кітабіна еңгізілген. Анамыз сегіз құрсақ көтерген. Балалары жалпылдап отырғанда шетінеп кете берген. Содан қалған екі бала Нұртайы 1954 жылы, Тотиясы 1960 жылы дүниеге келген. Нұртайдан төрт немере Бекболат, Дания, Жанболат, Мирболат, Тотиядан екі немере Арман, Асқар сүйген. Тұңғыш немересі Бекболаттың екі баласын, яғны Дариясы мен Даниярын көзінің тірісінде көріп, қазақша айтқанда шөбере қолынан су ішкен бақытты әже. Немерелері Бекболат пен Жанболат байланыс саласында, Даниясы «Электросистема» мекемесінде, Мирболаты мұғалім, Арманы Авияцияда ұшқыш, Асқары Авияция инженері болып жұмыс жасайды. «Ұлықпан ұрпағымен мың жасаған» деген бар ғой. Анамыздың соңында қалған балаларынан Аллахқа шүкір немере, шөберелері бар. Анамыз 2002 жылы сәуір айында 74 жасында дүниеден озды.