БОЛБЫРЛЫҚ

Болбырлық — сылбырлық, ынжықтық, босаңдық түрінде көрініс беретін адам мінез-құлқы мен қимыл-қозғалысының сипаты. Болбырлық, көбінесе, ішкі сенімі әлсіз, жасқаншақ, жүрексіз адамдардың бойында жиі кездеседі. Қазақ халқы мұндай жандарды бейнелі түрде “жауын жаумай су болған”, “шөккен түйеге міне алмас”, “аузынан сөзі, қойнынан бөзі түскен” деп әжуалаған. Болбырлық кейде кісінің сырт сипатына, яғни, қимыл-қозғалысы мен киім киісіне ғана қатысты қолданылады. Бұндай адамдардың қимылы шабан болса да, тілі шапшаң, мірдің оғындай болады. Жалпы Болбырлыққа қарама-қарсы ұғым — ширақтық, жинақылық. Болбырлықтан арылу кісінің өзін-өзі қолға алып тәрбиелеуіне, өзіне сенімін нығайтуына байланысты.