БОЛЫСТЫҚ МЕКТЕПТЕР

Болыстық мектептер, бір класты орыс-қазақ болыстық мектептер — 19 ғасырдың аяғында Қазақстанның солтүстік облыстарында ашылған мектептер. Ресей Халық ағарту мин-нің 1875 ж. 4 маусымдағы Ережесіне сәйкес бір класты бастауыш уч-щелер деңгейінде бекітілген. Алғаш Ы. Алтынсариннің ұйымдастыруымен Торғай облысының Бөрте, Обаған,Жетіғара, Қарабұтақ болыстарында жұмыс істей бастады (қараАлтынсарин мектептері). Оқу мерзімі 4 жыл. Ауылдық мектепті бітіргендер Болыстық мектептерде 2 жыл ғана оқыды. Қазақ балалары жатақханада жатып оқуға тиіс болды. Оқу бағдарламасында орыс тілі,діни ілім,ана тілі, арифметика, ән айту пәндері оқытылды. Қазақстандағы түрлі типтегі орыс-қазақ уч-щелерінің бірі ретінде Болыстық мектептер тек Далалық және Орынбор оқу округіне ғана таралды (қара Бастауыш халық училищелері). 1887 — 91 ж. Торғай обл-нда жеті Болыстық мектептер, 1881 — 1901 ж. Орал облысында алты Болыстық мектептер ашылды. Ал 20 ғ-дың басында Семей, Ақмола облысындағы кейбір ауылдық мектептер Болыстық мектептер болып қайта құрылды. Болыстық мектептер сондай-ақ, Бөкей ордасында да ашыла бастады. Болыстық мектептерді бітірушілер 2 класты орыс-қазақ уч-щелерінде (6 жылдық) білімін жалғастырды. Дегенмен Қазақстандағы басқа оқу орындарына қарағанда Болыстық мектептердің саны аз болды; қара Білім беру.