БОЗШАКӨЛ

Бозшакөл

Бозшакөл

Бозшакөл — Есіл алабындағы көл. Қостанай облысына Сарыкөл ауданнда, Севастополь аумағынан шығысқа қарай 5 км жерде, теңіз деңгейінен 201 м биіктікте орналасқан. Аумағы 24 км2. Суы ащы. Жағалауы жазық. Көл алабы мал жайылымына пайдаланылады. Қарашаның басында мұзы қатып, сәуірдің басында ериді.

Бозшакөл мыс кені

Бозшакөл мыс кені — Павлодар қ-нан оңтүстік-батысқа қарай 125 км жердегі “мысты порфир” типті ірі кен орны. Бозшакөл мыс кенін ежелгі кен қазбаларының ізімен 1930 ж. Р.А. Борукаев ашты. Кен орны Бозшакөл антиклинорийінің оңтүстік қанатында орналасқан. Оның жаралу тегі төм. кембрийдің негізгі құрамды жанартаулық жыныстарын кесіп өтетін дайка (сығылма) тәрізді плагиогранит-порфир интрузиясымен байланысты. Мұнда ендік бағыттағы уатылу белдемін бойлай орналасқан екі кен денесі бар. Басты кен минералдары — пирит, халькопирит, молибденит, магнетит, олар сыйыстырушы жыныстарда ұсақ желі және сеппе түрінде таралған. Тотығу белдемінің тереңд. 3 — 40 м. Кен құрамында мыс, молибден, сондай-ақ алтын,күміс, рений, кобальт, т.б. бар. Кентастағы металл мөлшері шамалы болса да қоры мол, ашық әдіспен алуға қолайлы. Кен орны толық барланып, игеруге дайындалған.