БОЙЖЕТКЕН
Бойжеткен[1]— кәмелет жасына жеткен қыз. Қазақ халқының түсінігінде Бойжеткен бейнесі жастық пен әдеміліктің, сұлулық пен әдептіліктің рәмізі ретінде қалыптасқан. Қазақ ұғымындағы Бойжеткен уыздай тәтті еркелігімен, назды қылығымен ерекшеленіп, өз абыройын, намысын берік қорғайтын, инабатты, мінезі биязы ару болу керек. Қыз баланың бойжетуін қазақ халқы үлкен бақыт санап, оның ерікті болуын қалаған. Сондай-ақ, “қызға қырық үйден тыю” деп, Бойжеткеннің тәртіпті болуын қатаң қадағалаған. Жеңгелері Бойжеткенге “Еркежан”, “Сырғалым”, “Күлімкөзім”, “Ақмаңдайлым” деп ат қойып, қашан “жат жұрттық” болғанша аялап өсіруді міндетіне алған. Қазақ халқы Бойжеткенге ізетті болу, әсем киіну, әкені күту, шешені сыйлау, ұлттық дәстүрлерді құрметтеу, өнерпаз әрі іскер болу, т.б. талаптарды қойған. Бойжеткен — отбасының ұйытқысы болатын болашақ асыл жар, ұрпақ тәрбиелейтін ертеңгі ана. Сондықтан қазақ халқы Бойжеткен тәрбиесіне қатты көңіл бөліп, оның бойына өнегелі қасиеттерді дарытуды ұлттық парыз деп санаған.
Пайдаланылған әдебиет[өңдеу]
- ↑ “Қазақ Энциклопедиясы”, II-том
|
Бұл бөлімде бастамасы. Сіз оны толықтырып, дамыту толықтырып, дамыту |