БОК Иван Иванович

Бок Иван Иванович (8.10. 1898, Башқортостан, Белебей қара — 30.09.1983, Cанкт-Петербург) — ғалым, геология-минералогия ғылым докторі (1943), профессор (1948), Қазақстан ҒА-ның акад. (1954), Қазақстанның ғылым мен техникаға еңб. сің. қайраткері (1955). Орал тау-кен институттын бітірген (1928). 1928 — 36 ж. Орал геол. барлау партиясының бастығы, Қазақ геол. тресінде аға геолог, 1938 — 68 ж. Қазақ кен-металлургия ин-тында (қазіргі ҚазҰТУ) доцент, кафедра меңгерушісі болды. 1968 — 75 ж. Қазақстан ҒА-ның әлем және жер жөніндегі ғылымдар бөлімшесінің акад.-хатшысы, Қазақстан ҒА-ның Төралқасының мүшесі міндеттерін атқарды. Бок Иван Иванович Қазақстанның ультранегіздік жыныстарының петрологиясы жөніндегі іргелі еңбектердің, кен орындарының геологиясы, кен түзілу теориясы бойынша алғашқы оқулықтардың авторы, Орталық Қазақстанның (Сарыарқаның) болжамдық металлогениялық картасын құрастыруға қатысқан. Никель сульфидті кен орындарының қалыптасу мәселелерін жете зерттеп, Қазақстанның никель-кобальт кендерінің жіктелімін жасаған. Лениндік сыйл. лауреаты (1958). Ленин, “Құрмет Белгісі” ордендерімен және медальдермен марапатталған.