БОЛҒАНБАЕВ Қайретдин Әбдірахманұлы

Болғанбаев Қайретдин Әбдірахманұлы (1893, Ақмола обл. Қорғалжын ауд. — 21.10.1937, Ташкент) — журналист, қоғам қайраткері. 1917 — 18 ж. М. Шоқай, С. Қожановтармен бірге “Бірлік туы” газетін шығаруға қатысты. 1918 — 19 ж. Ташкент қ-ндағы пед. курста оқыды. 1919 — 21 ж. Ташкентте, Орынборда мұғалім болып қызмет етті. 1921 ж. Ә. Бөкейханов пен А. Байтұрсыновтың тапсырмасы бойынша Бұхарадағы басмашылар қозғалысына Энвер пашамен бірге жетекшілік етіп жүрген Зәки Уәлиди Тоғанмен кездесіп қайтты. 1922 — 23 ж. Ақмолада, 1924 — 27 ж. Петропавловскіде халыққа білім беру бөлімі меңгерушісінің орынбасары болды. 1928 ж. ОГПУ шешімімен “халық жауы” ретінде 5 жылға сотталып, Батыс Сібірге жер аударылды. 1934 ж. айдаудан оралған соң Алматыға келген, кейін қазіргі Оңтүстік Қазақстан облысының Сарыағаш ауданына қарасты Қапланбек а-на көшіп, сонда тұрақтап қалған. 1937 ж. саяси қуғын-сүргін кезінде тұтқындалып, атылды. 1958 ж. 26 ақпанда ақталған.